МЕМО активно вклучен во процесите за имплементација на реформите во енергетскиот сектор – 5,2 милиони евра од ЕУ за енергетска трансформација

Националниот оператор на пазар на електрична енергија – МЕМО активно е вклучен во процесите за имплементација на реформите во енергетскиот сектор.

На пленарниот состанокот за ИПА 3 – Прозорец 3: Зелена агенда и одржливо поврзување кој го отвори министерката за енергетика, рударство и минерални суровини Сања Божиновска, заедно со претставници на делегација на ЕУ, како и сите релевантни домашни и меѓународни чинители во секторот енергетика, акцентот беше ставен на вложувањата во енергетската независност и еколошките извори на енергија.

Во овој домен, Елизабета Гиовска, кооринатор на оддели и Александар Ристовски, раководител на оддел за управување на пазарот на електрична енергија, истакнаа дека МЕМО посветено работи на значајни проекти како пазарно спојување или маркет каплинг со берзите на соседните земји и членки на Европската унија за успешно интегрирање на македонскиот пазар на електрична енергија во единствениот европски пазар, како и воведување на гаранциите за потекло-GOs кои ќе како единствен доказ за потеклото на електричната енергија произведена од обновливи извори.

ИПА 3 – Прозорец 3, претставува рамка за финансиска поддршка од Европската Унија, наменета за зајакнување на зелената агенда и одржлив енергетски сектор. За оваа програма обезбедени се финансиски средства во висина од 5,2 милиони евра за поддршка на проектите за намалување на штетните емисии, зголемување на енергетската ефикасност и развој на обновливите извори на енергија.