Рекорден обем на тргување на Македонската берза на електрична енергија во август 2026 година

Македонската берза на електрична енергија забележа рекорден обем на тргување во август 2026 година, со вкупно 199.698,9 MWh истргувана електрична енергија на пазарот „ден однапред“. Ова претставува зголемување од 58,15 % во однос на август 2025 година, кога беа истргувани 126.292,1 MWh

Вкупниот месечен обем на тргување во август годинава, претставува нов рекорд на Македонската берза на електрична енергија и е значаен показател за зголемената активност на учесниците и растечката доверба во организираниот пазар на електрична енергија.

Претходниот највисок месечен обем на тргување беше регистриран во јануари 2026 година, кога на пазарот „ден однапред“ беа истргувани 153.028,7 MWh електрична енергија.

Споредбата покажува значително зголемување на обемот на тргување, како и на просечната дневна активност на берзата, што потврдува дека пазарот „ден однапред“ продолжува да добива сè поголемо значење во тргувањето со електрична енергија.

Резултатите остварени во август претставуваат уште една потврда за развојот на организираниот пазар на електрична енергија во земјава и за зголеменото учество на пазарните учесници во берзанското тргување.

МЕМО продолжува со активности насочени кон понатамошен развој, унапредување и интеграција на пазарот на електрична енергија, со цел создавање поефикасен, потранспарентен и поконкурентен пазар во интерес на сите учесници.