Примопредавање на функцијата управител на Националниот оператор на пазарот на електрична енергија МЕМО

Денеска во МЕМО ДООЕЛ Скопје беше извршено примопредавање на функцијата управител на Националниот оператор на пазарот на електрична енергија МЕМО, меѓу новоназначениот Зоран Ѓорѓиевски и досегашниот управител Симон Шутиноски.

Шутиноски му посака успешна работа и реализација на претстојните проекти во насока на натамошно осовременување на Операторот на пазарот на електрична енергија, во чиј склоп е и македонската берза на електрична енергија. Управителот на МЕМО, Ѓорѓиевски, му се заблагодари за досегашната соработка и најави дека ќе работи чесно и посветено на развојот на македонскиот пазар на електрична енергија во сите негови сегменти.

Шутиноски ја извршуваше функцијата директор на подружницата – Оператор на пазарот на електрична енергија и член на Управниот одбор на АД МЕПСО од 2017 до 2019 година и управител на МЕМО ДООЕЛ Скопје од формирањето во 2019 година.

Ѓорѓиевски е со долгогодишно професионално искуство во областа и од 2014 година е дел од Операторот на пазарот на електрична енергија, а од формирањето на МЕМО раководеше со одделот за организиран пазар на електрична енергија.