Регистарот на Гаранции за потекло на електрична енергија достапен и на македонски јазик

Националниот оператор на пазар на електрична енергија – МЕМО ДООЕЛ Скопје го направи Регистарот на Гаранции за потекло на електрична енергија достапен и на македонски јазик, со што дополнително се олеснува користењето на системот за сите домашни учесници на пазарот.

Од април 2025 година, кога МЕМО успешно го воспостави Регистарот во соработка со Grexel, издадени се над 190 илјади Гаранции за потекло за 20 компании, како потврда дека користат електрична енергија произведена од обновливи извори.

Сѐ поголем број компании се приклучуваат кон Регистарот, што претставува важен чекор во градењето на транспарентен и современ енергетски пазар во земјата. Преку овој систем, МЕМО обезбедува усогласеност со националните и европските регулативи, одржувајќи сигурна и стандардизирана платформа за издавање, пренос и активирање на гаранциите за потекло.

„Континуираното зголемување на бројот на издадени гаранции и интересот од компаниите ја потврдуваат важноста на овој механизам за развојот на зелениот пазар на електрична енергија. Нашата цел е да обезбедиме транспарентен, сигурен и европски усогласен систем кој ќе им помогне на компаниите во исполнување на нивните цели за одржливост“, вели Денко Рафајловски, раководител на служба за обновливи извори на енергија.

Воспоставувањето и развојот на Регистарот претставува значаен придонес кон зголемување на довербата во потеклото на електричната енергија од обновливи извори, како и поддршка на компаниите во исполнување на нивните цели за одржливост и зелена транзиција.